是日隨筆 收左工之後其實一個人企喺街度都幾迷惘。「跟住去邊度？」e個問題真係可大可少，問題只在腦海裏一浮現就開始燥，要搵間野塞滿個肚。 去到雅閣，同相熟嘅伙計打聲招呼就開始搵位。地踎茶樓搭檯就例牌㗎啦，咁啱好有一檯幾個阿叔零零舍舍吉左個位喺度，彷彿係量身定做一般，便欣然落座。 D阿叔基本上都係一盅兩件，有位仁兄更加經典，淨係叫左隻鹹蛋黎送酒。我好似發左癲咁咁叫左成半檯野食，似*旺財般狼吞虎嚥，突然對面幾位阿叔拎起杯青島。 「𡃁仔！碰個杯先啦！」 「好好好，身體健康身體健康。」 「大家咁話。」 我拎起攞茶杯相碰，飲完後阿叔面露慍色。 「喂！你飲錯野wo！」 我心裡愕然，不知其所謂何事。然而阿叔用手一指，定睛一看牆上赫然貼著「酒精飲料區」 引得衆人都鬨笑起來：店內外充滿了快活的空氣。 *旺財：朋友代養之流浪狗，因每日工作忙碌而無暇顧及，每日只能在有限時間陪伴及餵食。因受前主人虐待，性格膽小且驚慌，無人之時甚至不吃不喝，需要有人陪伴才肯用餐。 （得閒留言再續）