由中學開始認佢，到大學，再到社會大學，期間已經陪佢由初戀去到唔知第幾段戀情。 # 每次收到佢電話，聽到：「可唔可以出嚟陪我？」我都只係回答一句：「無問題，即到。」已經唔記得係第幾次出現係佢屋企樓下。 我只係記得，我曾經有幾次都想同佢講：「不如你同我一齊，我會俾到幸福你！」可惜嘅係我無勇氣講出口，我驚一講佐出口，連做朋友既機會都無。 # 有一次同學聚會，有個同學問佢：「你哋以前成日都朝夕相對，而家你又單身，會唔會考慮一下佢呀？」我當時裝作若無其事，但事實係我既注意力已經係佢身上。 我聽到佢話：「傻啦，我哋係友達以上戀人未滿，不過佢係我呢一世人最好嘅閨蜜。」講完呢段說話，就向我呢邊方向望咗過嚟。 我避開佢既眼神扮聽唔到，但係心裏面已經心如鹿撞。 # 呢種關係繼續維持左幾年，期間佢轉左幾個男朋友。 直到有一次，佢同佢男朋友去咗日本旅行。 有個朝早，突然收到佢whatsapp打嚟嘅視像電話。 接通電話後，只係見到佢一個人喺日本嘅街道上行緊，同時間見到佢淚流滿面。 「佢又打我啦….」 # 當時聽到佢講呢句說話，我已經心急如焚，想馬上飛去佢身邊，安慰佐幾句後，我立刻上網買當日最快嘅機票，飛去搵佢。