喺美國就快住咗一年 每日都發現呢度成日都有啲奇怪事發生 今次講吓“拎錢” 事件一 前排我同個女去搭巴士 巴士站有個應該三十歲左右嘅女人坐咗喺度等巴士 當我同阿女行到個站 個女人問我識唔識講英文 我答佢識 佢就問我有無兩蚊俾佢搭車 我答佢我無呀 我用手機app搭車㗎咋 咁佢就話ok 巴士到站 我同個女就上車 女人緊隨我哋後面 我心諗佢無錢係咪應該搭唔到車 點知佢上到車同司機講咗兩句就上到車 究竟佢講咗啲咩可以唔使俾錢上車呢？ 迷！ 事件二 上星期老公車我去超市買餸 我一落車就有個女人行埋嚟問我你有無兩蚊 (但佢明顯唔係homeless嚟嘅) 我話無呀 (我是連兩蚊都沒有的窮撚) 聽完佢就行開咗 見佢步履輕型咁直接行咗入去Ross行街 究竟佢係行過即興無嘢做問我拎錢 還是佢真係有經濟問題行乞？ 事件三 嗰陣我哋初初到埗老公都仲未搵到工 我哋喺超市買完嘢喺停車場慢駛緊出公路嘅時候 突然有架車慢駛埋嚟我哋度 個男司機較低車窗同我哋講： 我三個星期無返工喇 你可唔可以幫吓我？ 嗰吓我老公忍唔住笑住答佢： 我7個月無返工喇 好抱歉我幫唔到你 香港人在美國