教育入行之路 - 2 讀中文個三年，其實覺得自己係玩多過讀，總之順利畢到業，雄心壯志諗住踏足教育界。點知撞正金融海嘯，巿道差到連full time PGDE都好多人爭。得中大約我返去面試，最後結果都係無回音，唯有寄信啦。 我由五月開始寄到七月，由教師去到後尾連TA都寄，都係得三間學校有回音搵我去面試。最後得一間有機會second in，係做TA，要教一班中一中文，其餘係行政同support，人工係12k。我心諗，巿道差，無法啦，於是就應承咗。 自此我就算正式踏入教育界。由第一年做TA，到第二年做AT，到第三年合約教師，期間完成埋PGDE課程。 因為本身係紅褲仔出身（最基層），所以特別搏殺，八九點收工係日常，而最幸運嘅係我係尼度遇上一位教識我好多野嘅上司兼中文科主任，佢亦都成日帶住我地班後生嘅老師出去見世面，參加教育局唔同嘅計劃，又成日接啲project返嚟，然後自己帶頭捉埋我地啲後生一齊落手落腳做，一齊揼啲教案揼到八九點收工，第二日再觀課交流。 第五年，係科主任力保之下成為常額教師。 一切都係際遇，係不幸嘅2009年，讓你遇上最幸運的事。 一切都由12K開始。