麻瓜的動物傳心法 我其中一隻貓有過度舔毛問題，睇咗幾次醫生、照皮膚、種菌，都確定唔係皮膚病，咁應該係情緒問題。同時，我有感自己每日掛住返工，返到屋企求其Hea 隨便瞓，冇好好照顧家庭事務及大小朋友，於是我開始每早晚同啲貓傾偈。 我睇過啲育兒文章，佢話如果你問小朋友「有冇發生開心嘅事」，就可以引導佢向開心嘅方向諗，於是我每日都會問佢哋：「你今日過成點呀？有冇發生開心嘅事呀？有冇同大家好好相處？」有啲會開心咁喵返我轉頭，有啲運用身體語言挨身挨勢，或者攞個頭埋去撞你，更加冷靜嗰隻，淨係同你瞇瞇眼，表示：「我聽到啦，你退下啦。」 除咗問佢哋問題，我都會同佢地分享每日發生嘅開心事但係我每日都只有返工，於是我每日講：「我今日最開心嘅事，就係返到嚟，見到你哋健健康康企直直咁迎接我。」佢哋或瞇眼、或撞頭咁回應，然後我哋番去各自嘅 comfort zone 匿埋。唔知傾咗幾耐之後發現，過度舔毛嘅貓貓，大髀手仔嘅毛全部都生番晒出嚟。 然後我先發現「養貓」唔係淨係擺長糧有水飲就OK，仲要記得畀 attention 同愛佢哋。留意番，不論對家人、伴侶定寵物，身處同一空間但掛住碌電話唔算係陪伴呢。