關於老師（三）- 面試 第一就一定要把握自我介紹嘅時間。要講你以往做過啲乜嘢，講你可以幫到學校做啲咩。例如小學，你教到中文。咁你可唔可以帶辯論隊話劇班？甚至你識啲特異功能例如STEAM呢啲全部都會加分。唔好再嘥時間講一啲你CV有嘅嘢，直接拎你之前喺某間學校做嘅一個實例/實戰經驗講好過。因為佢揀得你in就代表你個CV已經OK 。 第二係唔好臨急抱佛腳。第一次in其實就有機會要試教。我四次interview四次都係早到咗好多，然後咁啱四次都係第一次in就要試教，一開頭收到份嘢係嚇親，不過因為早到咗嘅關係，所以成個鐘比我準備，當然最尾講得好好。同埋唔好淨係帶啲文件去，帶部電腦/iPad甚至乎帶成村教材去完全係冇問題！ 第三就係盡量都預備定幾條問題，同埋做好成間學校嘅research 。例如原來嗰間學校都幾缺乏辯論資源，你就可以問：你哋會唔會有辯論隊嗰啲㗎？因為我可以帶到，所以想問多少少關於呢個方面嘅資訊。一聽到即刻加晒分，唔單止有做research，仲要講到自己嘅強項&可以幫到學校啲咩。 我好明白市道真係好差，我都係寄咗差唔多二百幾封信先有人請！大家加油！  教育 老師