我們仨 2024-08-17 藍藍4個月快樂！ 呢一個月藍藍情況反反覆覆，出現啲無預計過嘅情況，爸爸媽媽情緒亦都跟住上上落落。因為肝臟影響，肚仔出現肚水要做引流，但頭幾日肚水出現血色，好擔心有地方大出血。好彩做完檢查無大出血，藍藍亦都好叻，幾日已經變返正常肚水顏色，仲可以抆埋引流管。又有俾啲痰塞住，呼吸得唔好血氧跌，要急救，嚇到媽媽爆喊打俾爸爸趕嚟醫院，好彩藍藍好叻豬，抽走啲痰好快就穩定到，不過都嚇到爸爸媽媽喊到眼都腫晒。好多謝果日有位護士陪住媽媽，又整濕面巾俾媽媽抺眼淚鼻涕冷靜下。 有幾日藍藍開眼仔，眼仔碌碌咁周圍望，古靈精怪咁，果日爸爸媽媽就好似中咗六合彩咁開心。因為仲插住喉仔，好難得有幾日可以聽到藍藍講嘢，嘰喱咕嚕咁回應同人傾計咁，呢個互動帶俾爸爸媽媽好大安慰同滿足。 雖然呢一個月反反覆覆，但藍藍又長大一個月，祈望上天對藍藍嘅考驗已經結束，日後唔會再有突發情況。爸爸媽媽祈求唔多，只希望藍藍情況穩定，等爸爸媽媽可以陪你多啲，愛錫你多啲，有美好嘅回憶多啲。 藍藍豬4個月快樂🩵爸爸媽媽愛你 🖤💛🩵