唔知從幾時開始我發現每個人嘅思想同自由意志一樣都會喺某程度上被我地自己學習嘅語言、家庭嘅背景、接受嘅教育同成長嘅經歷去影響。所以一直以來我都唔會用「理解」呢個詞語，因為呢個世界只存在‘’不同程度上既誤解‘’。 要做到最小程度嘅誤解，我哋只需要客觀就可以。客觀呢兩個字好似好簡單，咁真係做到嘅有幾多人？好多人包括我在內所謂嘅思考都只不過係自己主觀世界嘅投射，往往就係因為咁大家最後都成為大家主觀感受下的怪物。覺察到只係第一步，但要做到客觀真係好難，好似你要將你自己從身體中抽離。個世界觀會變到好似第三人稱咁，多左去思考唔同人唔同嘅角度同埋觀點之後你就會發現對與錯好與壞會變得好模糊。因為好多時候你嘅對與好對人哋嚟講係錯與壞。有嘅就只有每個人盡力之後既無能為力。當我有呢種思維之後就好似變得與世無爭咁。因為呢啲嘢由頭到尾你都控制唔到，只有將自己活出自己理想中嘅樣子，咁就已經足夠。大概呢樣嘢就係所謂嘅順其自然吧。