「以繪畫角度解釋攝影立體感」 影相界成日都有個cult(唔係culture 真係cult)，就係成日講邊支鏡有立體感，尤其玩Leica或者賣Leica嗰班人會拎呢樣做賣點。大光圈鏡頭Noctilux系列更加係當中表表者。今日就試吓同大家用畫畫角度解釋我認知嘅「立體感」。 喺畫畫入面我哋中小學va老師會提一個概念叫「近大遠小」。主要就係講物件同眼睛嘅距所反映嘅大小，呢一點係好易理解，我哋眼收到嘅訊息就係相對大咪近啲，細咪遠啲。但剩係呢概念係唔足以表達一個畫面嘅立體感。呢個時候我哋就要討論吓「前清後濛」嘅概念。 用攝影嘅語言，呢個叫景深（Depth of Field)。我哋回望返一啲強大嘅美術品，佢哋都會用呢個概。以Mona Lisa為例，Lisa姐本人為「勁清」，後面啡色景物為「小清」，綠色景物係「小濛」，再後啲嘅景為「勁濛」。我哋睇畫嗰陣，如果作品可以分得愈多層次嘅「清同濛」就愈符合人類眼晴所見到嘅「清同濛」，亦即係所謂嘅立體感。 放返喺影相入面，我哋留意下鏡頭嘅景深尺，就會發現光圈愈大，景深覆概範圍愈少，而人眼分辦到「濛」嘅層次一定唔會夠「清」嘅多。 續…