鰹魚刺身配蕎麥麵 鐘意食日本嘢嘅朋友應該對柴魚片唔陌生, 但柴魚變先柴魚片之前, 又知唔知佢未加工前嘅樣呢? 柴魚片普遍係將鰹魚加工再刨片而成, 而鰹魚本身係紅肉魚, 腥味被吞拿魚更上一層樓, 並唔算好主流嘅選擇, 所以認識兼且有食過嘅人並唔多. 去餐廳食嘅話, 通常會配薑蓉（唔係燒味嗰隻, 呢隻真係純薑）同綠蔥去中和佢個味. 個人比較鍾意配蕎麥麵一齊食, 昆布汁嘅鹹香味, 溝埋白蘿蔔蓉, 綠蔥同芥茉可以好好襯托到鰹魚獨特嘅味道. 而鰹魚以刺身嚟講喺多倫多應該算係一個比較平嘅選擇, 圖中成條魚喺多倫多一間較貴嘅刺身舖 - Taro Fish 都唔使十五蚊. 唯一較為遺憾係呢度白蘿蔔係中國產, 磨蘿蔔蓉要將白蘿蔔嘅苦味同辣味減到最低須要唔少耐性.