車程好長，故事都好撚長。 「我盤生意越做越大，餐廳開到上深圳。我咪話喺灣仔開咗印度餐廳嘅，之後喺中環開埋意大利餐廳，總之就好忙。我喺灣仔，個個都知我係邊個。」 咁撚串，得唔得㗎，我心諗。都係嗰句，我無膽講出口。 「有一晚收鋪，個客未走，問我去唔去駱克道飲嘢。咁我之後冇嘢做，咪落去飲嘢。我同老婆講去飲嘢，問佢去唔去，佢話想抖吓，唔去啦。」 架車駛上汀九橋，望出去馬灣白茫茫一片，同我嘅而家嘅命運一樣，我都想chur返枝煙先。 「去到駱克道，我見到好似我老婆嘅身影，攬住個男人。我望真啲，真係我老婆嚟。三個人你望我，我望佢，佢望你。老婆冇同我講嘢，就咁行走咗，我思考咗好耐，點解？點解要偷食？我好嬲，嬲到打俾佢啊媽，佢啊媽話原諒佢一次啦，佢衰過一次，就唔會再衰，但我決定咗要離婚。」 事隔多年，我feel到佢心中嗰股憤怒。如果佢可以的話，應該雙手拍撚晒軚盤，但佢冇，我執返身彩。Xavier原來真身係Luigi嚟，失覺曬。 「我返到屋企，佢喊住同我say sorry，話唔會有下次。我同佢講，你搬返九龍城舊屋啦，之後佢就執嘢走。盤生意我冇心機run落去，所以我執晒佢，諗住分少少錢俾佢。」