今日發生咗單嘢，我要「廿八蚊一斤排骨」，呀姐唔知咩事俾咗成兩條排骨我，我話唔要咁多，要一斤夠喇。佢以為我要「一根」，就話「你要一枝呀嘛」，仲重覆話「而家啲人講普通話，搞到廣東話差曬」。（其實係佢理解錯誤，明明係磅一斤排骨俾我就搞掂） 呀姐assume 我係講普通話，之後不停說教，搞到我明明母語廣東話都懷疑自己表達得唔好。如果我係學緊廣東話嘅人，其實係咪會更加懷疑自己，之後唔敢講？ 唔知其他地方對非母語者學官方語言嘅態度係點，但係我觀察到香港呢個地方係好唔「學廣東話-friendly」 第一，香港人成日話廣東話好難，第一下已經挫咗銳氣，仲邊有人敢學（講難，其實我覺得日文都好難，咪又係咁多人學） 同埋成日有人高高在上「指教」初學者，人哋點敢再開口講。試過有菲律賓人買餸問：「呢個幾多蚊呀？」呀姐用好差嘅態度講：「呢個幾錢！唔係呢個幾蚊！」老實講，我唔覺「呢個幾多蚊」有咩問題，勉強要講嘅係可能有歧義，但未去到唔明，態度咁差就會令到人冇信心講落去。認識有啲朋友明明講得好好，但平時唔敢落柯打，怕阻到人/俾人話，其實好可惜：（ （估唔到第一個post係俾街市呀姐激親而開，好小家）