唔知有冇人信整定 想分享下暫時係我人生中其中一件我覺得好奇妙既事件 話說當年我考會考，無錯我係考最後一屆會考，所以都幾緊張，覺得考唔到就要repeat 一個新嘅課程，好鬼煩 所以派左準考證之後，我會事先去一去啲學校，因為我要知道exactly點去，坐咩車，入口係邊到，諗住去一次就最穩陣。 事件發生係我考中文個日，考場係真光，應該係坐小巴去既，但我個日望住架小巴走，心諗真係唔好彩！等下一架又唔知等幾耐，我係一個極準時既人，唔容許自己岩岩準時，係一定要早到，所以我決定要坐的士。 上到的士我同司機講：去油麻地個間真光 司機: 油麻地邊有真光 我: 油麻地個間，廣華醫院對面，近華仁嗰間呢 司機: 揸左咁多年的士我都冇聽過 （我心諗有冇搞錯，當年真光都算幾岀名，冇咩理由唔知掛) 司機：不如你攞張準考證睇下 點知我攞張準考證岀黎一睇，考場係九龍塘間真光！我嚇到呆左，好好彩我準時咁到左考場。 其實成個過程我冇講過我去考試， 唔知點解司機會叫我攞準考證睇下 唔知點解揸的士會唔知個到有間真光 有超多唔知點解，但我好感恩，我覺得係上天派呢位叔叔黎幫我🙏🏻❣️❣️ 咁多年後諗返都仍然覺得好神奇