Facebook唔見人講金像獎，以為終於冇人理，點知原來嚟晒Thread。 賽果嗰啲冇興趣討論，唔係女朋友想睇基本上我冇興趣睇，但有人話劉嘉玲尋晚言論失禮梁朝偉，證明Thread普遍用家都好細個，梁朝偉好識揀，佢揀咗一個提升到自己生活質素，甚至令自己更上一層樓嘅女人做老婆。 呢個討論令我諗起Victoria同碧咸，費格遜好憎佢，佢覺得Victoria令碧咸唔可以專注於足球。但Victoria係好有遠見嘅女人，碧咸唔可以踢波踢一世，碧咸靚仔又有知名度，Victoria由碧咸未掛靴就幫幫佢建立人脈，創造球星以外嘅形象，除咗拍廣告仲投資其他生意。碧咸嘅球員生涯好輝煌，但唔會令佢掛靴後做到名人，冇Victoria嘅生涯規劃，碧咸就係堅尼嗰啲個個禮拜靠喺skysport鬧曼聯搵錢嗰類過氣波牛。仲未計Victoria喺碧咸98世界盃後、轉會皇馬、米蘭面對幾多風雨，一己之力頂住頭家。 搵伴侶，外表幾好幾有錢都冇用，最重要係有能力令你變得更好，推動到你進步，失意時對你不離不棄，快樂失意都會同你分享，呢個世界好多女人真係溝嚟攞債，但劉嘉玲肯定唔係呢類。