終於完sem!!!熱烈恭喜自己 續行匀香港地——柴灣 唔知大家有冇去過羅屋民俗館，實際面積唔大。民俗館係一座法定古蹟，保留並模擬客家人屋企，而屋主姓羅。你就會諗：點解客家人會由大陸走到落柴灣咁鬼遠？事實上佢哋一開始喺新界定居，但當時新界區域主要由圍村人，五大氏族居住嘅地方，稱為本地人。而客家人亦被稱為外人。所以要喺新界居住甚至組織屬於自己嘅村落並唔容易。所以有部份客家人就走到柴灣，因為柴灣三面環山，有好多樹木。所以吸引佢哋到柴灣，方便日常砍柴。 政府1950年代陸續興建徙置大廈，公屋後，配合社區規劃，客家村亦逐漸需要遷離。最後羅屋亦係唯一僅存嘅客家民居。 民俗館鄰近興華邨，興華二邨前身係徙置區，後來有翻新過，但整個結構都好有舊公屋風情，屋苑設施錯綜複雜，平台充滿各式小店，髮理店，餐廳，士多等。其中有一間柴灣必去餐廳，「興華茶餐廳」。當日下午三四點，只有幾枱客，年紀都目測過50歲，相信係老街坊。驚訝係兩位樓面都好後生，不過30。但對老街坊嘅口味瞭如指掌，又會客製化佢哋個餐。 留言再續