雖然平時份人好敏感，但係一啲好重大嘅事情上我都好習慣逼到自己好numb，費事自己有咁多負面情緒，所以鬼剃頭咗一段時間都唔知自己嘅壓力來源係邊度。 所以今日發夢嘅時候就大爆喊醒咗，夢見同男朋友喺另外一個世界相遇，佢做咗一啲好危險自暴自棄嘅事情，話係因為佢有個朋友自殺死咗所以先會咁，然後我就開始喊醒咗，再打電話俾返緊工嘅男朋友再大爆喊，話點解你每一個世界喺識我之前都咁慘？ 至於佢人生有幾慘我都唔具體咁講，但佢係識咗我之後，係咁話係我拯救咗曾經有抑鬱嘅佢，只需要攬住我就唔使再食煙食草（所以佢已經戒咗），會同我講好鍾意每日都可以車我放工，但明明係一件好辛苦嘅事。喺識佢之前我永遠都唔相信會有男人為女人而改變，亦都唔相信啲男人會珍惜你嘅好，但當你有一個俾佢好攰嘅時候坐副駕已經會感動到喊嘅男朋友，同佢喺車度食外賣傾計大笑都會感動到想喊，為咗你剪咗佢留咗好多年嘅長頭髮，我先知原來可以有例外。