啱啱喺韓國食飯，隔離枱係一對香港母女，個囡同我差唔多年紀。 等緊野食嘅時候個媽媽問：「我地聽日去邊呀，要幾點起身？」個囡就答佢：「聽日要行10個鐘街呀，8點半要起身」媽媽寵溺咁笑一笑，冇任何怨言。 之後佢地野食到左，囡攞左部ccd相機出嚟叫媽媽幫佢影相，媽媽仲自動自覺喺袋攞左支唇膏出嚟比囡補妝。影嘅時候呀囡唔滿意，話媽媽影得太多啲食物，媽媽就較角度影到靚為止。 雖然呀囡嘅語氣感覺有啲唔耐煩，好想媽媽識得幫佢影靚相，但媽媽都冇嬲，淨係默默咁繼續幫呀囡影靚相。 我覺得好可愛。呀囡喺20歲呢啲年紀肯同媽媽兩個嚟旅行；媽媽又肯接受新事物陪呀囡嚟行街食辣野，又學影相，呢種親情難能可貴。 令我諗返起我細個嘅時候同媽咪行書局，佢買左好幾本台灣嘅浸溫泉旅遊書。我嗰陣唔明點解佢要買呢啲書，直接去咪得囉，睇完又唔等於浸左，同埋台灣又冇乜特別，洗乜買咁多本。但呢對母女令我慨歎，有時有啲野真係唔係必然。細個覺得大個有機會賺到錢就請媽咪去台灣旅行浸溫泉，可以去遠啲添啦，大把機會報答佢等佢享福。 但未等到中學畢業已經再冇呢個機會了。中學畢業，放榜，入大學，呢啲媽咪通通都缺席了。 留言續