Source: https://medium.com/@studio19a 「-ese 係蠻夷國家嘅人先用……呢個講法，除咗喺一啲香港嘅討論區睇過之外，我未見過亦唔太搵到其他語言嘅資料去支持呢個講法。而呢個講法，解釋唔到點解喺歐洲嘅葡萄牙、馬爾他，佢哋嘅 demonym 會係 Portuguese 同 Maltese，亦解釋唔到 Milan、Genoa 等地嘅 demonym 點解都會係 Milanese 同 Genovese。 追溯返 -ese 後綴嘅源頭，我哋會發現佢係由古法語 -eis 後綴借入，而 -eis 後綴本身亦係源自拉丁文。而呢個 -eis，正正就變咗做我哋而家喺法文裡面見到嘅 -ais 同 -ois。兩者可見於 français、anglais、japonais、chinois 等稱謂，當中唔見得帶有貶義。再舉西班牙文、意大利文兩隻同樣脫胎自拉丁文嘅羅曼語族語言做例子，佢哋用嚟組成 demonym 嘅 -és 同 -ese（同英文同源）後綴亦唔見得帶有貶義，例如 inglés/inglese、irlandés/irlandese。」