繼續 英國生活 兩年前嚟英國，早過我哋地埗嘅朋友舊同事同學都好多，大部份人都係揀大倫敦或大曼城地區。 一來我哋一心唔打算有「投靠」任何人嘅打算，二來唔想喺太過繁華嘅地方落腳，所以一二線好受香港人歡迎嘅城市都畀我哋否決晒。 最後揀咗一個南部小鄉村落腳。唔係熱門城市，到埗時樓價還可以。 當時BnB一個月要三四萬，唔想使太多錢，所以初初到埗只租咗兩星期酒店，兩個人拎咗四個大中細喼，還好夠位開喼。 因為只係租咗兩星期，仲好記得當時第一日到就撞正heatwave，行咗條highsteet一次就好唔舒服咁返房瞓覺上網搵盤算數。 然後第二日搵租盤得個吉，又無agent call back 😓 第三日朝早踩落agent搵租盤，好彩即日約到第三個盤。朝早睇完心心眼盤即刻落offer，晏晝再踩入舖問有冇update，佢先施施然打畀業主，然後業主accept咗offer。 就係咁，到埗第三日就租到樓。 隔兩日見咗業主雙方滿意，到埗七日收匙。 一年租，新裝，近市中心。我哋無講價，諗住南部租偏貴啲，但都叫做一千有找租到terraced house，算係咁。 去到呢度尚算順利，繼續感恩😃