想講我好似係泰國撞到「朋友仔」2 —— 上次講到我係格蘭島炒車之後，我都一直冇向呢個方面去諗，只係覺得自己唔小心。但當我返到芭堤雅，處理曬傷口之後，我就開始覺得唔係好對路。 第二日，咁我炒完車，醫生叫我唔好周圍去，要休息多啲，所以我哋一行人就得我自己一個留喺間酒店入邊，其他人就繼續佢哋嘅行程（至於邊間酒店我就唔講了，只可以講我哋係住醫院隔離嘅酒店啦）咁嗰日佢哋出咗門之後，我就係張床到睇YT啦。但睇睇下，我眼尾望到廁所個黑影又出現返，但我望過去又冇嘢，呢一次我都係覺得應該係自己睇錯，但隔一陣之後我又望到個黑影，嗰一刻我啲雞皮真係由頭起到落腳趾尾。咁我見到咁多次之後，其實都知道間房係唔乾淨架啦，但我一直安慰自己冇事嘅，可能係啲花灑嘅倒影嚟嘅啫。所以我就直接背向咗個廁所，手機聲較到最大，望唔到就當佢唔存在。咁的確，我背向咗廁所之後我就冇望到個黑影。平靜咗一陣之後，我間房嘅電話響咗，樓下嘅酒店經理琴日見我全身都係傷，所以打上嚟問我食咩，話佢送上嚟俾我食順便「望一望」我嘅情況。當下我覺得間酒店嘅服務都幾好吖，所以就話我冇所謂，食咩都得，之後就cut咗線。 字數限制，下個post一陣再講埋