想講我好似係泰國撞到「朋友仔」3 —— 咁隔咗一陣，個經理上咗嚟。佢的確手上面係攞住一碗湯飯，佢放低咗之後就企係我床邊同我吹咗兩句水。但當佢同我傾完計之後，佢就開始周圍望。之後佢入咗廁所行咗個圈，出嚟就笑笑口同我講我一陣間再叫人入嚟幫你執一執房，之後就走咗。 於是我就坐起身食咗個飯就繼續睇YT啦。而嗰一日嘅朝早晏晝都的確冇再發生啲咩。直至到差唔多夜晚，咁因為我驚嘅原故，我全日都係背向個廁所，而張被係包住個頭咁樣訓。但因為隻手壓得太耐好痹，而且又好似真係冇乜事咁樣，所以我就膽粗粗咁訓返平，冚返好張被。就係喺我轉身嗰一瞬間，窗簾位置我見到，係直視！唔係眼尾望到！有一個白影好快咁飄過！我知道呢個一定一定係好朋友嚟！唔係乜撚嘢倒影。因為我拉咗窗簾，嗰個位根本冇嘢俾佢反射！當刻嚇到我即刻又用張被冚返個頭。唔知大家明唔明我嗰陣幾無助，跑又跑唔到，因為隻腳痛到連行都唔得。想揾人壯膽，但間房又得我一個。所以我就係咁睇啲好笑嘅片，希望可以冇咁驚。之後我就覺得個人好攰（可能係關我食咗止痛藥事）所以就訓着咗。 等到我啲朋友返咗嚟嘅時候，我係完全唔記得咗呢件事！而我都冇咗驚嘅感覺。 字數限制，下個post再講