《Eternal Sunshine》 前男朋友J. K係一個好賤格嘅人渣。 發現咗佢出軌後，佢用咗好多冷暴力去逼我主動同佢分手，其中一件事係，佢偷情對象嘅生日係我之前，我問佢係咪一定要同人哋慶祝生日，佢話係，完全真係唔會有任何掩飾。其實我好佩服佢，完全唔使理人感受(我係nobody) ，都要對自己身體誠實，呢一種情操，真係難能可貴。 我記得當時距離呢一件事差唔多仲有一個月，喺呢一個月裏便，就算我返香港短短幾日佢都係會去咗人哋屋企，凌晨先返嚟。每一日對我嚟講都係折磨，控制唔到，逃避唔到，阻止唔到。嗰一日越嚟越近，我忍受唔到要面對呢一件事，我買咗一張單程機票，執咗啲夏天同埋冬天嘅衫，掉低咗日本間屋乜都唔理，喺呢一日嚟到之前就飛咗去英國。當時覺得自己好似流浪狗。 臨走之前唔知發乜神經，懶係煽情send咗呢一張圖俾佢(Remember me. Try your best; maybe we can.) 佢已讀不回。跟住我就轉咗電話以後都唔會再開返嗰張咭同嗰個電話。 自此以後，我睇到呢一句說話我都仲會覺得好heartbreak 同自己多鳩餘。亦勾起好多我唔想記得嘅嘢。