分享一些我以往行山的體驗。 之前有朋友帶過我分別行過麥1、2、3，咁順住落我決定自己試吓行麥4，上網搵齊路線資料、圖片，仲打印埋出嚟，喺一個風和日麗嘅星期六，由水浪窩出發啦！ 對下手上資料，睇吓路牌又問吓人，基本上都係順利嘅，喺昂仲睇人玩paragliding, 真係好靚呀！ 經過基維爾營時開始天黑，繼續向前行，已經見到麥5嘅牌，心諗今次大鑊了，網上資料無講過麥4終點即刻係麥5嘅起點，好彩向前行少少，到咗馬路，離開山路，個人就定好多，沿住條馬路一直向前行，經過一架van仔但無人喺度，唯有繼續向前行，突然我見到遠處有隻唐狗向住我邊吠邊追過嚟，嚇到我即刻掉頭走，再見番架van，司機都返咗嚟，於是問佢點行出去搭車，佢話佢都唔識，但可以送我一程埋 ，我正猶豫之際，有一男一女跑山友出現，一問之下佢哋係會行到去扎山道再落彩虹搭車走，大約個半鐘啦，我再望下van仔司機，決定死跟住果兩位跑山友，呢兩位跑山友都好好人，跑下停下帶我出到扎山道，我第一眼見到唔係扎山道觀景台，係一·架·紅·的，仲要係吉車，我諗都唔諗即刻衝上車！就咁，我嘅首次麥4行就有驚無險下完成啦！ 待續….