《浪漫傳說3》真係劃時代3A大作，當然個劃時代唔係畫面啦，係遊戲性。 90年代嘅遊戲機，講緊32Mb嘅game已經榨乾機能，所以從依家角度睇當時遊戲，就好似米高安哲羅睇個小朋友畫畫咁，無得比較。 但如果從佢哋承載嘅內容去比較，我唔覺得浪費傳說、FF、DQ呢啲系列會輸俾ELDEN RING。 浪漫3嘅地圖、自由度、音樂、怪物，就算擺喺依家嚟睇，都係超級豐富。遊戲玩法係傳統JRPG回合制，但又唔用升角色Lv嘅方法，而係升武器、學新招作為重點。而且學新招要睇運氣，做啱步驟都未必學到，喺無攻略又有強迫症嘅情況下，想儲齊所有技，就要煲隻game，所以重玩性一流。 另外，每個角色得8格放技能，但遊戲總技能嘅量恆河沙數，趣味就係你打唔同怪就砌唔同組合。角色多、技能多，怪物每隻都有自己嘅攻擊招數、防守耐性，完全已經係打芒亨嘅節奏。當然機能唔可以好似依家咁爽快流暢，但我就係鍾意呢種捉棋式嘅思考。 新世代遊戲，畫面同動作一定要有，大作必然係超現實，咁我就會問，可唔可以唔係呢種AI真人、真實環境嘅風格呢？遊戲嘅出現，好大程度係想令人忘記現實，距離先會產生美，未來嘅game有無可能既有距離又有投入？