睇完公開試當真 後發現，我可能/或者/應該無公開試創傷。 見到有人話過咗好多年仍然會發惡夢夢到考試場境，我有啲surprise，可能我無，或者可能都有嘅，但真係重來都記唔到夢境，一醒咗就咩都唔記得。無經歷過放榜嗰種失望、嬲自己唔夠努力，但諗返轉頭，我想自己玩多啲，好純粹咁玩。 最深刻嘅位就落咗係YY Lam講盡力與動力。做得補習老師，佢當然係成績好好，但係紀錄片短短幾句話入面，佢說服到我，係個體制裡面盡力去做，出到黎結果如何係其次，最重要係有無盡哂力，為自己努力一次。呢種心態，好似係事業、人際關係、興趣、財務、健康…唔同方面都應該要有。 的而且確公開試呢個考核方法有好多限制不足，一日仲係個體制入面，都要玩呢個遊戲，而離開學校之後遇到嘅制度會係更黑暗、複雜、不公。細心留意，其實唔少人就係呢啲限制之中，鑽唔同角度、方法去嘗試實踐佢哋心目中嘅理想模樣。 PS睇完終於分到豪同賢 PS2睇緊嘅時候忍唔住諗，點解許賢個人咁卡通、把聲咁卡通??