準時真係美德，特別係係服務性行業，需要預約嘅，店舖最怕最憎遲到但唔講聲，奉旨人哋等你嘅客，做客人亦好討厭明明約好日子時間，準時到反而要你無故坐起到呆等成粒鐘嘅鋪頭/負責人 曾經約過一個新髮型師剪同電頭髮，一開始約咗夜晚七八點，但根據個人經驗，我個頭每次電親都起碼三四五粒鐘，於是同佢講怕阻佢哋收工，無謂到時搞到人十一二點先走，亦怕佢哋會貪快想收工，hea整我個頭，改做平日下晝十二點，做佢當日第一個客，又唔洗等 。 結果我早到十分鐘，11:50到salon ，receptionist同我講髮型師未返到，我已深感不妙…但樂觀地諗，以為約咗12:00，應該12:15點都到啦，結果呆坐到12:30，一個sorry嘅message或電話或receptionist交代聲都無，忍唔住whatsapp問個髮型師去到邊，幾點會到，再遲我就cancel booking，唔好浪費大家時間，然後係12:45髮型師先施施然，毫無悔意行入間salon同我講：「哎呀，尋晚星期日遲咗訓，今日訓晏咗唔知醒，你知㗎啦😄」