關於謝師宴，我想講幾句的。 (想講好耐，拖稿拖到自己都頂唔順) 老實講，今年無謝師宴係有點失望的。失望在於無咗最後一次同大家見面嘅機會，而你地無咗係人生青春入面一次重要嘅集體回憶。講真，去咗超過十次謝師宴的我，係已睇化「謝師宴」呢個名係明存實亡，學生先係主角，呢個係屬於你哋嘅舞台，女的衣香鬢影，男的醒目有型，大家為中學生涯畫上一個小小句號，準備蛻變成為大人。而我通常站著如褸儸，默默係旁邊為大家高興。講真謝師宴幾時有衷心謝師？你又有幾尊重老師？謝師又係咪淨係呢一日先會謝？你知我知單眼佬都知。 年經係每年都一定會聽到「點解我要請嗰個老師食飯？」「好貴喎，點解要俾咁貴？」「點解我唔想去都要我俾錢？」「佢去我咪去囉」「都無人去」 更難聽的說話都有。 當然明白會有好多情緒，對學校、老師都有好多不滿，但我覺得如果樣樣野都用錢去量度而忽略人情味，到最後你只會得不償失。唔通我又下下同你講唔報名參加比賽唔練波唔搞咁多課外活動，因為無得OT補水加人工咩。錢洗咗可以再搵，但謝師宴同青春，一生只有一次，同學聚會，畢業後你地再齊人嘅機會我肯定係零。