媽寶男（二十八） 拍拖初期，K已經成日形容佢媽係「美魔女」，話佢雖然年過60，但依然保養得宜。憑住佢嘅美貌同「親和力」🙂（嗱，佢的確係用呢三個字），K媽簡簡單單去個街市，好容易就可以同啲商販打好關係，之後人地每日都會自動自覺留啲靚魚靚菜俾佢，後來知佢原來有個30歲寶貝仔，個個都表示難以置信。 總之K係經常將佢媽得到嘅「特別待遇」掛喺嘴邊，由於我冇見過佢，靚唔靚我無從蹊蹺，但如果佢真係好似K所講咁人見人愛，咁我只能夠講佢係一個雙面人，粗俗啲講，翻轉豬肚就係屎。 Probation期間，我地有日食食吓飯，K又開始對佢媽讚賞有加，話佢不單五官清秀，而且到今時今日依然保持皮膚緊緻嫩滑，連身材都維持得好好，係早兩年大病後先開始微微現肚腩，之前一直fit到冇絲毫贅肉。 之後我聽到：「但係佢身材又超好㗎喎！哇，正常人唔會有呢個比例，即使宜家年紀大咗，都仲係好堅挺，個shape超靚！而且顏色都......」 由「堅挺」嗰度開始，我個腦已經警鈴大響，之後再聽到「顏色」，我直頭好似俾雷劈咁，擘大個口得個窿，啲麵由個口跌返落個碗度。 （下篇續）