激動到手震咁打字Post呢個文。唔係為讚好或者博流量。睇完就算，thanks。🙏🏻 呢2日心情好沉重，冇心情工作。睇留言睇到眼濕濕嘅時候，無意中見到人講「郁啲就自殺」。人都走咗，點解可以講得出毫無同理心嘅說話？佢有經歷人哋所經歷嘅嘢咩？「郁啲」？雖然我唔識死者，但我真係好嬲，點解會有人可以咁留言？！ 有冇諗過人哋開心嘅表面，背後其實正正係相反？啲人話唔開心/有心事可以搵信得過嘅人/朋友傾訴。如果有更多人關心，係咪可以防止到自殺？如果係嘅，我都希望所有唔開心/有自殺傾向嘅人都會有人關心。生命可貴，生命冇take 2。自殺都好需要勇氣。 我今日又見到其他人嘅Post話自己「頂唔順，對唔住」，我第一時間係想安慰對方，不過見到已經好多人喺留言安慰緊，我就唔多此一舉。但期間我見到有人留言話Post主喺到博人注意。黐線！難道人哋可能唯一嘅渠道去放負都唔得？放負就係博人注意？咩心態？有冇諗過佢哋行出呢步打開心扉講自己心事已經好好？係咪要間接逼到人哋走去自殺先至知道事態嘅嚴重性？呢啲人搞到真正有自殺傾向嘅人都唔敢搵人傾訴。如果Post主因為呢啲人而走去自殺，嗰個留言嘅人其實係間接嘅兇手！可惡啊