十年過後重遊Natural History Museum，估唔到會成為今次英國之行最失望的景點。 行入去第一個展廳主題係人類演化，有展出南方古猿Lucy、尼安得塔人標本。但係再行入去就開始怪怪地，好快有間gift shop，博物館個展廳中間無啦啦間左一大忽做左間乜柒野T-rex restaurant, 再行多兩步又一間gift shop, 成間博物館搞到成個商場咁。地下一層至少開左兩間餐廳、三間gift shop，取而代之就係放展品嘅空間大幅縮水，重災區一定係古海洋爬行動物化石展區，起碼縮左一倍以上，英國作為全世界最豐富海洋古生物化石出土嘅國家，都真係幾悲哀。 咁恐龍化石展區又點呢？展區面積應該冇咩點少到，但就加左大量可以觸摸嘅互動展品，在面積限制下大量恐龍化石標本被升咗上天花板，睇得唔舒服唔清楚之餘仲要完全冇文字介紹，件化石標本就純粹係一件裝飾品，最離譜就係無啦啦整個綠幕俾人影CG合成相打卡，搞到成個侏羅紀主題樂園咁。 雖然我都明白間嘢冇收你入場費，佢都要成本去維持，增加俾小朋友玩嘅互動元素亦係好，但搞到呢間歷史上享負盛名嘅博物館成個主題公園咁我就真係接受唔到。