前排見精神科護士，可能係我誤會咗，我以為佢係做心理輔導，但原來唔係。全程主要係查家宅起底式咁問問題，除咗有關我個人由細到大嘅背景資料，仲有好多唔關事嘅問題，包括伴侶有幾多個兄弟姊妹，兄弟姊妹（非同住）的年齡、職業、有無子女、幾多個子女及其性別等等…..依啲其他人嘅野關我情緒咩事？我唔係好明。反而我想同佢表達我的情緒感受、內心困擾，幾次講幾句佢就打斷我，繼續問返佢嘅問題。想問吓佢有冇建議畀我點樣可以改變自己嘅思考模式，唔好諗野一下子就咁悲觀，佢答我…你都識得話你自己咁樣，你就唔好諗，少啲諗…..叫我多啲出街接觸吓朋友… （ok 多謝，我好艱難咁擺底bb特登抽時間出去見，諗住會唔會有咩幫助，或者我之前真係有錯誤期望。）我話既然姑娘評估我過去7日嘅抑鬱分數唔高，覺得我只係適應問題，我係咪唔駛再嚟都得，姑娘又叫我約住先當傾計（但我唔覺個過程似傾計，同埋我唔想特登請假嚟「傾計」，因為佢唔似有心去聆聽我嘅困擾），姑娘堅持約咗先，叫我遲啲cancel 。（好吧，其實我感受到姑娘都唔想再約，不過可能佢都係要跟程序做） 下次都係無謂浪費大家時間喇。