運氣 廿歲開始應該係我行大運嘅十零廿年，19歲做第一份工遇上好嘅上司，除咗工作上嘅提攜，私下當我妹妹咁照顧，每日孖公仔咁，幾年後一齊跳去另一間公司，好快一齊得到老闆信任同重用，頭一年幾個月加一次人工，之後加到一個職位內已算係頗高嘅level。到上司離職，升咗我去主管級（雖然只有一個下屬），以我學歷、能力同努力，已經係超額完成，純粹運氣佔大部份，細個屎忽痕上網比錢算命，話果廿年係行緊運，而不幸地運氣過咗真係乜都冇哂，份工做咗十幾年，因為我移民同疫情所以拜拜咗。 到而家離開咗幾年，當send msg 老闆問佢嘢，佢都120%嘅上心去幫我搵答案，返公司探佢，佢call哂全公司人去同我食lunch 。我真係好感恩我職業生涯遇上一個咁好嘅老闆。 人生裡面份工帶比我好多嘢，錢、自信心、眼界、滿足感、安全感，喺冇工作呢幾年，好似個人冇咗一忽，我成日發夢返工、仲要不斷夢到自己唔收人工都要繼續返工。