貪婪 ============= 臥底咗咁多年 發現教會嘅牧者都有個共通點 就係好容易會誤解聖經 人哋係叫你履行十誡遠離七宗罪 你班友仔讀咗咁多年都可以成日掉轉 實在講唔去 不過都要多謝佢哋 為我提供咁多笑料 做臥底都冇咁苦悶呀嘛 佢哋最常擺烏龍就係「履行」貪婪 外國某牧師穿櫃桶底呢啲新聞我就唔講啦 江洋大盜起碼目標遠大 我respect 最搞笑嗰啲係貪小便宜貪到好肉酸嗰啲 我見識過某牧師x經常同教友食飯唔俾錢 永遠食到差唔多就會拉住老婆起身話有下一場走先 最好笑係啲教友提一提返佢要夾返錢 佢隻耳仔就會間歇性失靈 可能係聖靈充滿咗令佢淨係聽到上帝嘅聲音 聽唔到我哋呢啲凡夫俗子世俗嘅訴求 其實你收收埋埋啲十一奉獻唔夠洗你可以祈禱問上帝攞多啲恩典先 正所謂「上帝的恩典夠你用」你點都捱到去下個月出糧嘅 再唔夠嘅話 咪食住聖餐頂住先 何必咁肉酸呢？你咁樣啲事傳咗開去你話你仲點樣呃人哋信你？But who am I to judge?我只係一個世俗嘅人 呢個故事係冇結局 因為仲一直發生緊 基督徒日常  阿門