真係唔好再追捧嗰位叫Kenny Chan嘅先生。 之前已經喺垃圾站攞走隻流浪貓，而家又傳佢攞走咗隻廟貓。今次隻貓仲係有人養，如果行為屬實，根本就係盜竊。 上次攞走垃圾站隻貓，佢頭頭開直播嘅時候，就聲稱係人哋送俾佢。後來群情洶湧，就消失幾日，正當大家以為佢搞死咗隻貓，突然間有個健身教練出嚟替佢講說話，話係叫佢避吓風頭，隻貓係冇死到，大家集體炒車。健身教練話Kenny屋企雖然唔適合養貓，但係Kenny好有愛心。阿健身教練，好嘢，叻仔！話Kenny玩死隻貓嗰啲人，真係集體炒車。 不過後來， Kenny先生喺直播嘅時候，又爆咗響口，話隻貓係執返嚟！大佬，人哋好地地，你又唔係有經驗，執佢返嚟做乜呢！你係執返嚟，就唔好喺直播度講大話，話有人送俾你啦！ 好啦，今次就真係有傳條友攞一隻有人養嘅貓。咁我又放長雙眼睇，網民係咪集體炒車。