媽寶男（二十四） K好淡然接受咗分手，不過佢話要debriefing，想知下次拍拖可以點改善。😬 抱住獵奇嘅心態，我叫佢自己講先，佢第一句就話：「媽寶囉，呢個我都知嘅。😞」 正當我諗住大力表示贊同嘅時候，佢繼續：「不過分咗手我先同你講，雖然我覺得你係一個好女仔，性格外型身高都好，但我媽日日喺屋企數你，搞到我好大壓力。」 深入了解後得悉，K媽主要用三大原因數落我： 第一，話我夜瞓，唔健康。因為我之前份工唔係返一般office hour，即使宜家轉返office工，我都慣咗凌晨一兩點先瞓，而喺K媽眼中，呢個簡直係自殺行為，因為佢同寶貝仔每晚11點準時就寢。 第二點仲搞笑，話我好食得辣，又唔健康喎。K話：「宜家可能冇事，十年後就知分曉！」（呢個我唔知，我淨係你十年後都係咁，就極有可能都係同你媽一齊圍緊爐） 最後一點話我喺屋企唔洗做家務，又唔煮飯。聽到呢個我即刻話：「我唔洗做，但我識做肯做喎，反而我地去咁多日旅行，我未見過你洗一隻襪一條底褲喎🤯」佢以本能反應嘅速度答我：「咁我本身就係唔洗做㗎嘛！😠」我：「咁咪雙重標準囉！憑咩你可以，人地唔可以？😒」佢無言以對。 （下篇續）