媽寶男（二十五） 講講吓，K突然話：「其實我覺得我有潛質食軟飯。」 我真係好好奇，到底佢嘅自信從何而來，見我好努力控制表情，佢話：「咩呀你唔覺咩？我又高又靚仔，呢條路諗得過喎。」 嗰吓我已經講不岀聲🤣之後我諗返，其實一齊冇耐佢已經同我講，我想衝事業嘅話，佢唔介意做背後的男人，多啲照顧屋企同小朋友（但我當時已經覺得佢唔適合做父親，不能以身作則教仔，更何況佢唔肯做家務，點照顧頭家🤨）宜家我就明啦，原來當時嘅潛台詞就係想食軟飯🙂 跟住佢又話：「可能我要降低標準去揾下一個女朋友，外在內在都要，如果佢做老師就好，份工穩定，人工高，又早睡早起（佢好似對老師呢個職業有情意結🤣），不過最好係賢妻良母type，你唔係呢種🤗」多謝你，同埋good luck to her呀🥹 「其實我都知我媽嘅教育方式好扭曲，但冇辦法，佢係我媽，話佢或者唔理佢嘅話，佢會發癲。」 「不過其實比起我媽，我係錫你多啲，好多我肯為你做嘅嘢，我都未試過對我媽做。」呢一刻，我真心feel sorry for K媽，視個仔為人生唯一，但個仔只當佢係媬姆。如果佢咁叫做錫我，我難以想像佢媽得到嘅待遇係點。 （下篇續）