同朋友喺游泳池學游水見到有個呀叔下半身喺水度露械，見到成條嘢……跟住同教練講嘅時候唔見咗個呀叔。 過咗陣個呀叔出現返，佢一落水我都已經唔敢再喺泳池中間area 度游，淨係喺池邊度練踢水，到個頭上返水嘅時候，發現個呀叔喺正我隔離，原來我係佢target(唔好問點解我都可以係人哋嘅target, 係佢重口味啦）我朋友即刻拉我去對面池邊，點知個呀叔仲咁猖狂向住我哋方向游…即刻上水唔敢再游，跟住就搵救生員幫忙 報咗警但因為個呀叔有曾經唔見咗人，泳池cctv 又唔夠多角度睇到，而我哋認到嘅樣貌太大路所以警察都做唔到啲咩… 怪就怪見到露械嗰刻無即刻捉住佢（當時見到都線驚，唔知應該同咩人講，又唔知原來救生員都會管到呢樣嘢 但其實我搵救生員途中，有喺池邊坐嘅呀姨呀叔話見到佢跟住我，摸咗我兩次（但其實我學緊啲動作，有時都分唔到會唔會係掂到人哋之類，唉），又話呢個呀叔舊年已經喺度，平時喺出面睇吓有無嘢𥄫，無嘢𥄫就會入嚟室內訓練池𥄫，到問佢哋可唔可以幫手做證嘅時候，佢哋即刻話唔得閒 點解呢啲人可以存在咁耐喺公眾地方做呢啲事情？當刻報警係好想可以處理到呢啲人，唔希望有第二個人要經歷同樣嘅事