張敬軒與沉默是金 （二） 呢首歌唔難理解，大致上講人去面對謠言同指責嘅時候要灑脫啲，唔好放太多嘢上心，只要相信自己做緊嘅事係啱嘅就繼續做，講多無謂，沉默是金。因為歌詞琅琅上口，道理聽落好似簡淺易明又知易行難，再加上風頭火勢出首咁嘅歌，所以呢首歌好自然就獲得大家關注，乃至成為咗家傳户曉嘅歌。 講返演唱會，張敬軒喺臨唱前除咗謙虛咁誇獎許冠傑一番之外，亦不忘提到〈沉默是金〉呢首歌係佢特別揀選想唱嘅歌。我身為一個鍾情於過分詮釋作品嘅初代醫毛仔，好正常就會想過份詮釋張敬軒揀呢首歌嘅原因，再思量同比較張敬軒同張國榮對呢首歌嘅詮釋。 曾經喺十幾年前，好似好多香港人一樣，張敬軒係我最喜愛嘅男歌手。佢好多歌我都可以倒背如流，喺網上面都不斷重複又重複播放佢嘅演唱會表演，好似真係當係皇上咁拜。我好欣賞佢用演出嚟證明藝術係可以以任何方式、任何形式咁出現，而表演係唔應該受任何框架框住。加上佢嘅實力同努力，基本上佢可以成名，呢點係毋庸置疑。佢喺多個演出都投放咗強烈嘅個人意識，甚至有唔少代表佢價值嘅象徵入去。當年我甚睇到佢同張國榮所發出嘅光芒好似都幾接近，覺得佢可以成為一個最接近有張國榮影響力嘅藝人。