3 請求你，唔好晌我得知你入院之後人間蒸發，我真係唔想承認，終點晌呢度。   佢仍然無出現過。   直到籃球比賽決賽前嗰一晚，我食完晚飯，就自己攞個波落街練波。呢排嘅我，日日如是，無乜點同人講過野，無乜想講。好似只有不斷拍波不斷射波先可以支撐自己，令自己唔去諗咁多，令自己唔好咁多負面情緒。成日聽d哥哥姐姐講失戀最好嘅療癒方法，就係儘量唔好比自己靜落嚟，靜落嚟，你就會胡思亂想，猜疑自己做得好唔好，後悔以前點點點，有無咩野說話無好好講清楚…我諗當時我嘅感覺大概如此。 就係有d嘢翳住晌心度。   男生嘅友情，其實可以係咁嘅。   而嗰晚，打打吓，我見到…   就晌球場隔離嘅一幢唐樓簷篷上面，我見到佢。   光仔正坐咗晌簷篷上面，望住個球場。   佢無郁，無乜表情，就咁望住個球場。   嗰刻我失笑，心諗：「吖頂！做乜坐到咁高？返咗黎喇咩？」正想舉手Hi佢之際，嗰一刻，我定住咗，放低返手。　   唔合理嘅時間，唔合理嘅地方，俾我見到佢，而個感覺係好抽離。   我開始知道係咩一回事。   我竭力唔想承認我知道係咩一回事。 （留言續）