《關於我在北極養雪橇狗的這件事 - 3》 差唔多夜晚10點落機，Yellowknife個機場唔係好大，行李運輸帶有隻北極熊標本，有種「北極歡迎你」嘅感覺。 本來以為機場係老奉開廿四小時，打算慳一晚酒店錢瞓機場，但係個機場凌晨會閂門幾個鐘...好彩一早做咗research，有book定Motel，如果唔係真係要冰天雪地喺機場門口企幾個鐘。 舟車勞頓咗成日，第二朝10點又要再飛，攞完行李就急急腳行去搭的士返Motel休息。行出室外時都特登望下個天睇下有冇極光，遺憾地係冇嘅。 間Motel冇咩特別，都係上網求其book間最平，但求有地方瞓。咁夜啲舖頭都一早閂晒，成晚冇食過嘢，喺自動販賣機買咗條energy bar同一兜鬼佬叮叮飯，食完就瞓。 第二朝好早就起身call的士去機場，因為要提早兩個鐘到機場。當晚我瞓得麻麻地，一嚟勁驚miss咗班機，次次搭早機都係咁。二嚟太興奮，我好期待個旅程，但係又唔知應該期待啲乜，總之充滿無限遐想啦。 然而，呢趟旅程遠超過我想像。 （待續）