琴日我都睇到呆咗 明明上一年睇concert嗰陣都冇咩感觸 可能係今年屋企人走咗 今次喺紅館聽嘅感覺完全唔同 聽到個人完全反應唔到 仲記得今年中秋節 老母飲咗少少酒 佢喊住同我講佢自己嘅爸爸媽媽兩個都走晒 我都唔知點樣答返老母 淨係可以睇住佢喺度喊 我平時係一個好鍾意唱歌嘅人 亦有自彈自唱嘅習慣 啱啱攞起部結他好似平時咁 喺度諗緊唱咩歌 諗起給缺席的人唱首歌 咁就喺度彈 但係彈彈下唱唱下啲眼淚不停喺到標出來 自己失聲喊到唱唔到落去 可能我都太掛住婆婆 咁多個孫入面婆婆最錫嘅就係我同我阿哥 可能因為我哋兩個成日都唔喺佢身邊 平時同婆婆溝通都係雞同鴨講 佢用客家話同我講嘢 但係因為我淨係識聽唔識講 所以我只可以用返普通話或者一啲唔鹹唔淡嘅客家話同佢講嘢 明明前兩個禮拜返鄉下探佢都仲係幾精神 婆婆有老人癡呆都仲認到我阿哥 但係邊個估到過咗兩個禮拜之後 我就永遠都冇得再見返佢