HKDSE炒咗之後嘅升學之路 -延續9月5日post嘅最後一段留言- 完成文憑課程後，我積極搵Asso或者高級文憑課程。同文憑課程一樣，我好清楚自己學業上嘅缺點係邊，所以我都避免報讀任何有中文同數學科嘅課程。 每個課程我都係經深思熟慮先決定，我唔想同時報讀幾個課程，因為都要交行政費/留位費。萬一我唔讀，啲錢都無法退回。 最後我成功搵到個新開又好似為我而設嘅課程，高級文憑英文課程！我第一眼見就知道呢個就係唯一一個適合我同時係我唯一一個要報讀嘅課程。 啲課程內容非常好，雖然我有考得最差嘅中文科，但課程有好多其他實用又好有趣嘅科目。例如商業英語、語言，文化及社會、文學、公開演講及修辭學、性別學、創意思維和批判性思維、理解多元文化世界中的媒體、專業溝通、中英文學翻譯，等等。好難得起碼有9成嘅科目都係我有興趣讀！可惜，我今日查下，間大專已經冇提供呢個課程。 當時嚴重缺錢亦冇財務自由嘅我都冇要求過媽咪俾錢我讀書。因為我發現可以同時申請「專上學生資助計劃」同「專上學生免入息審查貸款計劃」。雖然好煩要交好多文件，又要解釋財務來源，但為咗減少財務負擔，唔可以嫌棄煩！ -續-