一百個英國開檔趣人趣事 # 009 開檔一段日子，偶遇過一啲高手食客 點為之高手？就係你同佢傾偈，總覺得佢係一個味蕾內功深厚，對美食有無比要求同執着嘅高手！🏆 有日，有位高大威猛嘅哥哥迎面而來 眼神堅定，同我四目相投 🦹🏻‍♂️：早晨，今日想試吓你哋啲漿 (我哋心諗，大鑊，究竟係乜嘢漿？) (糖漿？定係咩食物嘅別名？定係英文？) (如果呢個時候問佢咩漿，會唔會顯得我好膚淺？) 🦹🏻‍♂️見我遲咗2秒，再講：即係雞蛋仔 我答：收到🫡 (我要鎮定，我要保持冷靜，我唔可以俾對方知道我唔知佢講緊雞蛋仔) 我用盡畢生功力，全神貫注咁炮製呢底雞蛋仔 雙手奉上，問佢：覺得點？(🥹) (如果呢個時候係其他人，佢會答我夠脆夠香！） 但係🦹🏻‍♂️望一望我，停咗幾秒 (我心中大驚，點算？唔通唔啱口味？) 🦹🏻‍♂️只係講咗兩個字：地～道！ 高手惜字如金，簡單點評勝過千言萬語 呢個時候，我彷彿唔係企喺馬車上邊 而係與高手同站紫禁之巔，一東一西 交換咗一個惺惺相惜嘅眼神！ 🦹🏻‍♂️臨走前回頭講咗句：下次再試吓你哋個茶底！ (勁！佢講緊嘅唔係檸茶，唔係奶茶，而係茶底！) 英國創業