小五小六嘅時候，學校搵咗個靚女姐姐嚟教編織，嗰陣學嘅嘢好簡單，第一樣係用棒針織冷頸巾，第二樣係用鈎針鈎頸巾。因為我無乜耐性，所以每款都係學咗個開頭，織咗幾行就收工，啲針呀線呀擺喺櫃桶裏面吽塵。 直到中三左右，學校要求讀勁多科，由於我有拖延症末期，當年又無智能電話、電腦又成日俾老母check住係咪熱，熱嘅話代表開過，會打到我飛起，所以走去搵咗全屋所有最無厘頭嘅嘢出嚟玩，其中一樣就係織冷，貪佢喺聽到老母嘅腳步聲一嘢隊落櫃桶就收得埋，減低被打嘅風險。當年我去12蚊店買咗嚿識自動變色嘅毛冷，用小學學嘅鈎針短針嚟織咗個筆袋，自覺織咗幾年嘅quota，於是又擺低咗呢項活動。 其實我想學鈎短針，又或者一塊布狀物體以外嘅嘢好耐，但一直都無辦法的起心肝耐心咁學，就算睇youtube超慢速重播無數次，啲手指都一二一二咁，估唔到喺咁多年後可以鈎得成一件製成品。 因為呢隻桔係一件bb玩具，所以為咗提升用家體驗，喺裏面塞咗嚿有聲物體，下次研究吓有啲咩再響啲嘅嘢塞入去先:p 另外有一個位唔太滿意，就係縫個蒂同葉落去嘅部份，下次試吓整長啲直接打結先🍊 特此紀錄🧶