同男友食飯食到有PTSD - 2 一次機緣巧合下，佢嗰餐飯問咗我幾次想食乜，我仲記得我話「你終於會問我想食乜😌」 而呢個時候航空公司開始COVID後復飛，我哋開始一齊去旅行。拍拖可能一星期見幾日，而旅行係連續見幾日，每一餐都係一齊食，結果當然每次去完旅行返嚟我個胃都會痛好耐好耐。 慢慢我越嚟越覺得自己好委屈，初初我冇堅持話唔食，我自己係有責任嘅，但後來我好清楚表達咗我嘅情況，我會期望佢會多啲照顧吓我嘅胃病，但我唔係好感覺到佢嘅在意，調返轉會話我呢樣又唔食嗰樣又唔食，又或者講完想食啲乜嘢就加多句「不過你都唔食」。 我好願意陪佢去食佢鍾意嘅嘢，去到間餐廳度，如果唔多嘢啱我食，我寧願真係飲杯嘢都可以，但佢又會表現到好唔高興，話我揀嚟揀去都揀唔到。 因為食嘢呢個話題，已經有好多次嘅唔愉快，我而家好驚要同佢食飯，直頭見都唔係好想見。因為胃痛真係好辛苦，我覺得好大壓力，比着你哋會點做？ 除咗胃痛，仲好失望😞