正音問題見 threads 都有人提起「傳奇」。我都有段片紀錄呢個讀音嘅改造經過。剪出嚟都成三個鐘，係好悶嘅，但我冇專家名銜，冇得一言九鼎，只能用資料說服人，同埋要留片存證。 之所以值得講，係因為大眾一路用開嘅「傳 zyun6 奇」係完全有根有據、語義上解得通、有學者承認、有字典接受嘅讀音。只因何文匯唔接受，於是好地地一個大家講幾十年嘅正確讀音，就變成「錯讀」。 零九年東亞運動會以「創造傳奇一刻」為口號（何文匯做評委有份揀），運動會其間規定參與者要將「傳奇」讀「全奇」。之後TVB展開咗一場波瀾壯闊嘅「消滅香港傳奇」行動，將「傳奇」二字鑲入節目名、台慶口號、宣傳語句然後讀成「全奇」，去影響社會大眾。更甚者，有配音藝員為節目VO講出慣用嘅「zyun6 奇」，結果要重配做「全奇」。我從未見過一個電視台對一個完全冇錯（何文匯唔贊同）嘅大眾慣用讀音，憎恨到咁嘅地步。新聞部更加唔使講。我提供所有 zyun6 奇讀音正確根據畀佢哋都不為所動，堅持要全奇。 呢個詞語嘅讀音亂象，唔係因為我哋用開嘅「zyun6 奇」點錯，不如話係「何文匯不高興」，於是香港傳(zyun6)奇死路一條。