今日講下「雞肋」呢個詞語係點嚟，大家都有讀過《三國演義》楊修之死既故事。但係「雞肋」呢個詞語最早唔係出自《三國演義》呢啲小說，反而係出自正統嘅史書。 東漢末年，天下大亂，劉備同曹操喺漢中爭地盤，劉備打左幾場靚仗，成功奪取咗漢中。曹操想撤退，出咗道軍令，就咁「雞肋」兩隻字。西晉史學家司馬彪寫既《九州春秋》記載楊修話：「夫雞肋，棄之如可惜，食之無所得，以比漢中，知王欲還也。」 之後南朝宋范曄寫既《後漢書》有相等嘅記載：「夫雞肋，食之則無所得，棄之則如可惜，公歸計決矣。」兩則記載相近，只係「棄之」同「食之」兩句互換。 去到《三國演義》，有幾個比較早期嘅版本，我搵左最早嘅嘉靖本，係無雞肋既情節。之後到清朝毛宗崗父子改寫評點既版本有。楊修話：「以今夜號令，便知魏王不日將退兵歸也。雞肋者，食之無味，棄之可惜。」句式上同我地平日講既「食之無味，棄之可惜」完全一致。 我見到人引用《三國演義》，又或者一百幾年前嘅字典，去說明「雞肋」呢個詞既語源。如果我哋睇返古籍，最早西晉時代已經出現呢個詞語。