4/4 完場後，有隊友講，話頭先比賽嗰陣瞄到，晌觀眾席最後排好似見到光仔企晌度，跟住又有人和應，話佢都見到，問我見唔見到。 　 我話：「你地一定係眼花！」 　 直到今日，我地都無人收到過光仔嘅死訊，我覺得，佢同屋企人應該係去咗外國醫病，或者，外國已經有技術可以醫好佢嘅先天性心臟病。而家嘅佢，可能已經30幾歲，健健康康咁晌外國打緊籃球，睇緊佢最愛嘅「男兒當入樽」，或者，仲娶咗個鬼妹老婆。   我相信一定係咁。   三不五時，學校d師弟就會眾說紛紜，話空無一人嘅黃昏籃球場上面，傳黎一下一下嘅拍波聲，話晌課室走廊望落去，見到有個籃球自己晌到彈，好似有人拍緊咁樣，「嘭嘭…嘭嘭…」，但係成個球場都無人，言之鑿鑿咁話係以前籃球隊嗰個師兄返咗黎。   「以前有個師兄，佢係有先天性心臟病嘅，佢好鐘意打籃球，不過醫生話佢過唔到１５歲…」   我會一句得埋去，同佢地講：「on9！以前呢到係亂葬崗黎之嘛！」             對我黎講， 我寧願相信，   日本仔怨念未散， 都唔想相信，   我嘅最好朋友對呢度念念不放。 是吧？   假如可以再見到您，想同您講： 
光仔，生日快樂。 ❤️