飲食業 唔知大家會唔會同我一樣，鐘意食甜品，亦都鐘意食回憶。心中總有一間未必係最貴亦唔係最fancy，但一想食甜品一定會諗起佢既甜品鋪。我心中個間係旺角既Joyful。 住九龍既我成日出旺角，佢有我鐘意既甜品。九年前同男朋友岩岩開始拍拖，第一間食既甜品鋪都係佢。不論係當初仲好青澀既我地、經歷社運混亂既我地、疫情被打沉既我地，定依家少左周圍去既我地，間唔時都返去食。食佢既味道、食佢既溫暖、食我地既回憶。 I人到極致既我當然唔會主動同店員打招呼R水吹啦，不過個度既店員我一定認得。岩岩上網見佢話做到年尾唔做，感覺好唏噓。少左一間有人情既小店；少左一間見證我同男友九年感情（當然有排都未完😂）既小店；少左一個心中總有佢，世界發生咩事都會返去食既地方。