今次講吓做搞手嘅辛酸，小弟踢咗廿幾年波做搞手嘅有3隊： 第1隊係由初時做球員，到中期幫手去康文署排隊book場約友賽，後期踢聯賽我負責做搞手，有人無交錢就要自己貼。全季不敗奪冠但有隊友嫌踢得少，有矛盾之下我決定新一季唔踢，隊波從此消失。 第2隊係老細波，即係只需要帶boot同襪去球場踢完波仲有飯食嗰種，我踢咗8年亞軍就攞過3,4次。由初時做𡃁仔，到中期幫手管理，前後經歷咗3次換班底。我離開球隊有兩個原因，一係因為當初我不停說服老細報聯賽踢當俾我哋操波之後佢唔肯，兩三年後隊友搵咗另一班兵用埋球隊名義同資助報聯賽踢，嗰陣我淡出管理。另一個原因係有一場決賽輸波之後聽到有位管理層講「如果係XXX守就唔洗輸」。無人維繫就好易散，隊波依家得返班老人家去搞，踢比賽輸多過贏。 第3隊係足總波，頭兩季都淨係踢波，第三季兼顧總務同行政，到第四季所有行政同雜務基本上得我搞，下至買水洗衫搬波、攞場練波、上至去足總搞註冊同記錄球員出席、每個月墊兩萬銀出嚟，除咗出錢之外樣樣都要處理，而我唔係受薪又唔係隊長。 大家有穩定波踢要好好珍惜，做搞手純粹講個心，今季無成績嘅話我都係留返個禮拜日湊仔算。